ملعونون أم مقربون .. الله أعلم

جلست والأخ الكريم والصاحب المصحوب والصديق

العزيز مصطفى

وكنا نتحدث عن مباراة كرة القدم بالأمس بين الأهلي وطلائع الجيش وتكلمنا كثيرا وكثيرا .....

وسكتنا فجأة لا أعلم لماذا من الجائز لأنه ليس هناك كلام

واستمر السكوت

و قررت الكلام

وقلت :

نفسي أتطوع للعلم انى ابقى انسان تجارب بالظبط زى فأر التجارب

ضحك هو أشمعنا عشان الفلوس ولا أيه ؟؟ !!

لا عشان أستريح من الحياة

قالى لا بالعكس ده انته هيطلع عينك وبعد كده ده حرام انت كده بيتلقى نفسك فى الهلاك المبين

قلت طيب

أيه
رأيك لو الواحد يطلع مع ناس على سفينة فضاء وسبوه فوق القمر ومشيوا وسابوه
حد ما الاكسجين اللى فى البدلة خلص ومات ايه اللى هيحصلى بعد كده !!

هتحلل زى الموتى ولا ايه ؟؟!!

الدود هيعرف يوصللى ؟؟!!

هعفن ولا ؟!!

هروح فين لما أموت ايه طريقي ؟؟ !

تصدق تجربة جمده اوووي

ضحك هو وقال لكن متنساش ان ربنا هيبعثك يوم القيامة برضه

قلت له اكيييييييييييييد انا عارف ومعنديش شك فى كده ولكن ايه رأيك فى التجربة ؟؟

قالى :

أنت مجنون

سكتنا قليلا

وقلت :

تعرف ليه انا يطلت اقعد جنب الشباك فى المواصلات ؟؟

قالى ليه ؟؟!!

عشان بتعب جدا !!

ازاى ؟

بيتدوخ ولا ايه ؟؟

لا
مش حكاية دوخة لكن انا بتعب لما بشوف واحد راكب عربيته الفخمة المكيفة
ولابس أحلى هدوم ماركات عالمية ولابس ساعة عالمية فى ايده والواحد ده باين
عليه العز والصحة والعافية والقوة فى حين انا راكب الاتوبيس فى الزحمة
والحر والقرف ومش لابس ساعة ماركة عالمية ومش باين عليا الصحة ولا العز
بالعكس انا نحيف ومتنيل على عينى

وكمان

الواحد
ده تلاقيه وهو مروح بيتهم يدخل الشارع اللى مزروع كله شجر أخضر و ورد
والشارع نضيف محدش بيتف فيه يقف قدام باب العمارة يهب البواب يفتح باب
العربية للباشا و ياخد شنطة الباشا ويأخد الحاجات اللى جايبها للبيت من
شنطة العربية ويطلع فى الأسانسير ولا ملك زمانه ويدخل البيت المرتب ويلاقي
الزوجة العزيزة فى أبهي صورها ويلاقى الأولاد ( بابى جه بابى جه ) يا سلام
ومقولكش ع البيت رفاهيات الدنيا كلها موجود شاشة تليفزيون ولا السينما
وعرضها 2 بوصه والتكيفات فى كل غرفة حتى المطبخ

أخر مزاااااااااااااااااج ..

فى حين أنا وانت

ندخل
شارعنا القذر الذى اللى ما فيه شجرة واحدة وبيتنضف من عيد لعيد واللى
مليان ببلاوى من الناس ربنا يرحمنا واللى طول ما انت واقف فى البلكونة
تلاقى الواد محمد شريف اللى عنده 7 سنين بيشتم الواد عبدالله اللى عنده 6
سنين أحلى شتايم ليل ونهار

ولما
توصل البيت مفيش بواب ولا نيله اصلا مفيش باب للعمارة لو اسمها عمارة
اساسا وتطلع على السلم ويتقطع نفسك ونفس اللى جابوك وتدخل البيت لا أحد
بينتظرك بالعكس اول ما تدخل أنت جيت بدرى ليه ؟؟ !

وتقعد تستوى فى البيت من الرطوبة الشديدة طبعا مفيش تكييف يا باشا

وغيره وغيره وغيره ...........!!

وما خفى أعظم !! استر أستر ربنا يسترنا

احنا حيلتنا ايه غير الستر .. !!

وأنتهي كلامي وسكت هو ولم يعقب

فقلت .. أيه ؟؟

انا مش قلت أنك مجنون

قلت مش فارقة كلنا مجانين انت مجنون انك مفكرتش التفكير ده ...!!

أحنا فى عصر الجنون

قالى يا ابنى أتقي الله فى نفسك حرام عليك كده دماغك خسارة

انت متعرفش حاجة عن الرزق !!

ده أرزاقك يا سيدى !!

عمرك ما سمعت الجملة دى !!

قلت بص بدون الدخول فى الناحية الدينية لا ن انا مسلم وموحد وعارف كل ده بالعكس انا بصبر نفسي بالدين !!

وأردد أقوال الحكماء فى الصبر والفقر وأحفظها عن ظهر قلب

ولكن ...

قال ولكن ايه ؟؟ انت ليه مزعل وشاغل نفسك بالحاجات دى ده بدل ما تشتغل عشان تعيش حياة كريمة تحمد ربك عليها

يا ابنى بلاش سواد انت ليك يومين مش عاجبنى فى ايه .. ؟؟
مالك ؟؟

مالك مربي شعرك ودقنك ومش بيتكوي هدومك خالص ووشك أصفر ومظلم ومعفر ولا أكنك أهل الكهف ... !!

زعلان انك فقير !!مش عيب خالص لكن العيب انك تقعد تستنى الفرج كده وتحقد ع الاخرين

وسكت هو وسكت انا
قلت .. أحنا ملعونين فى المجتمع


[center]قال ..لكن مقربون من الله وكفي بالله